ОХУ-ын Ерөнхийлөгч Владимир Путин Ялалтын баярын 81 жилийн ойтой холбоотойгоор тавдугаар сарын 8-9-нд Украинтай хоёр өдрийн “түр эвлэрэл” зарласан бол Украины Ерөнхийлөгч Владимир Зеленский үүний өмнө буюу тавдугаар сарын 5-6-наас эхлэх “чимээгүй горим” буюу гал зогсоох шийдвэрээ мэдэгдлээ.

Зеленский “хүний амь нас аливаа бэлгэдэлт баяраас илүү үнэтэй” хэмээн онцолж, Москвагийн санал бодит энхийн алхам гэхээс илүү улс төрийн шинжтэй гэж шүүмжилсэн байна. Харин Кремль Ялалтын баярын үеийн аюулгүй байдлыг хангах зорилготой гэж мэдэгдэж, хэрэв баярын ажиллагаанд саад учруулбал Киевт хариу цохилт өгнө гэж анхааруулжээ.

Энэ удаагийн зэрэгцээ зарласан гал зогсоох мэдэгдлүүд нь энхийн хэлэлцээний бодит ахиц гэхээс илүүтэй дипломат болон суртал ухуулгын шинжтэй гэж олон улсын ажиглагчид үзэж байна. Одоогоор дайныг бүрэн зогсоох урт хугацааны тохиролцоо хийгдээгүй хэвээр байна.