Хятад улс хүүхэд асрагч, гэрийн үйлчлэгч, хүргэлтийн ажлыг нэг дор гүйцэтгэх боломжтой “KAI” нэртэй хүн төрхт роботыг танилцуулжээ. Шэньжэнь хотод болсон технологийн үзэсгэлэнгийн үеэр олон нийтэд үзүүлсэн энэхүү робот нь айл өрхийн өдөр тутмын ажилд туслах зорилготойгоор бүтээгдсэн байна.

“KAI” робот нь хүүхэд харах, өндөр настанд туслах, гэр цэвэрлэх, хоол хүнс болон бараа бүтээгдэхүүн зөөвөрлөх зэрэг олон төрлийн үүргийг гүйцэтгэхээр хөгжүүлэгдэж байгаа аж. Үйлдвэрлэгчдийн мэдээлснээр, зах зээлд бүрэн нэвтэрвэл ойролцоогоор 20 мянган ам.доллар буюу ойролцоогоор 70 сая төгрөгийн үнэтэй байх төлөвтэй байна.

Энэхүү робот нь хиймэл оюун ухаан, хөдөлгөөн таних систем, дуу хоолойгоор удирдах технологийг нэгтгэсэн бөгөөд гэрийн туслах үйлчилгээний салбарт шинэ үе эхлүүлж магадгүй гэж шинжээчид үзэж байна.

Гэсэн ч одоогоор “KAI” нь бүрэн худалдаанд гараагүй бөгөөд туршилт, үзүүлэнгийн шатандаа явж байгаа юм. Тиймээс бодит хэрэглээ, аюулгүй байдал, өрхийн орчинд тогтвортой ажиллах чадвар нь цаашид илүү тодорхой болох аж.

Хэрэв амжилттай нэвтэрч чадвал гэрийн ажил, хүүхэд асаргаа, хүргэлтийн салбарт хүний хөдөлмөрийг орлох шинэ шийдэл болж магадгүй байна.