БНАСАУ буюу Умард Солонгос улсын нийслэл Пхеньян хотод Орос–Украины дайнд оролцож амь үрэгдсэн цэргүүддээ зориулсан дурсгалын музейг албан ёсоор нээлээ. 

Музей нь гадаад цэргийн ажиллагаанд оролцсон цэргүүдийн “баатарлаг гавьяа”-г онцлон харуулсан бөгөөд Орос-Украины дайнд амь үрэгдсэн хойд солонгос цэргүүдийн дурсгалыг мөнхжүүлэх зорилготой аж. Үзмэрүүдэд дайны талбарт хэрэглэгдсэн зэвсэг техник, баримтат материал, цэргүүдийн тухай мэдээллийг дэлгэн үзүүлж байгаа юм.

Олон улсын ажиглагчдын үзэж буйгаар энэхүү музей нь Пхеньяны зүгээс тус дайнд оролцсон цэргүүдээ албан ёсоор хүлээн зөвшөөрч, дотоод суртал ухуулгын хэрэгсэл болгон ашиглаж буй томоохон дохио болж байна. Мөн энэ үйл явдал нь Умард Солонгос, Оросын цэргийн хамтын ажиллагаа улам гүнзгийрч байгааг илтгэж байна гэж шинжээчид дүгнэжээ.

Өмнөд Солонгосын тагнуулын байгууллагын тооцооллоор Умард Солонгосоос хэдэн арван мянган цэрэг илгээгдсэн байж болзошгүй бөгөөд тэдний тодорхой хэсэг нь дайны явцад амь үрэгдсэн гэж үзэж байгаа юм.