Японы Sony AI компанийн бүтээсэн “Ace” нэртэй ширээний теннисний робот дээд түвшний тоглогчдыг ялж, хиймэл оюуны хөгжлийн шинэ шатанд хүрснийг олон улсын хэвлэлүүд онцолж байна.

Reuters агентлагийн мэдээлснээр уг робот өндөр түвшний тоглогчидтой хийсэн таван тоглолтын гурвыг нь ялсан бол мэргэжлийн тамирчидтай өрсөлдөхөд зарим тоглолтод оноо авч, бодит өрсөлдөөн үзүүлжээ.

“Ace” робот нь ширээний теннис шиг өндөр хурд, нарийн мэдрэмж шаардсан спортод хүнтэй эн тэнцүү өрсөлдөх чадвартай болсон анхны жишээнүүдийн нэг гэж судлаачид үзэж байна. 

Тус робот нь 8 үе мөчтэй механик гар, олон өнцгөөс харах 9 камер бүхий систем, мөн бөмбөгний хурд, эргэлт, чиглэлийг бодит цагт тооцоолох хиймэл оюунд суурилсан алгоритм ашигладаг. Ингэснээр секундийн дотор шийдвэр гаргаж, цохилт гүйцэтгэх боломжтой аж.