Өмнөд Солонгосын Тэжон хот дахь O-World амьтны хүрээлэнгээс оргосон чоныг ес хоногийн дараа барьж, буцаан авчирсан талаар олон улсын хэвлэлүүд мэдээллээ.

Хоёр настай “Neukgu” нэртэй уг чоно дөрөвдүгээр сарын 8-нд хашаан доогуур нүх ухан оргосон бөгөөд орон нутгийн эрх баригчид шуурхай эрэн хайх ажиллагаа эхлүүлсэн байна. Чоныг барих ажиллагаанд 100 гаруй хүн, дрон болон хяналтын камер ашиглажээ.

Эрэн хайх ажиллагаа ес дэх өдрөө үр дүнд хүрч, амьтныг тайвшруулах буугаар унтуулан аюулгүй барьсан байна. Дараа нь амьтны хүрээлэнд буцаан авчирч, эрүүл мэндийн үзлэг хийсэн бөгөөд гэдсэнд нь загасны дэгээ байсан нь тогтоогдож, авсан талаар албаныхан мэдээлжээ.

Чоно оргосон хугацаанд оршин суугчдын аюулгүй байдлыг хангах үүднээс ойролцоох сургуулиудын үйл ажиллагааг түр хугацаанд хязгаарласан байна.