Туркийн зүүн өмнөд хэсэгт орших Кахраманмараш мужид байрлах дунд сургуульд 14 настай сурагч галт зэвсэг ашиглан гал нээж, дор хаяж есөн хүний аминд хүрч, 13 хүнийг шархдуулсан ноцтой хэрэг гарлаа.

Гадаадын хэвлэлүүдийн мэдээлснээр, халдлагын улмаас найман сурагч болон нэг багш амиа алджээ. Шархадсан хүмүүсийн заримын биеийн байдал хүнд байгаа тул хохирогчдын тоо нэмэгдэх эрсдэлтэй байгааг албаныхан анхааруулсан байна.

Уг этгээд халдлагад ашигласан зэвсгийг гэрээсээ авчирсан бөгөөд эцгийнх нь эзэмшлийн буу байсан гэж урьдчилсан байдлаар үзэж байгаа аж. Хэрэг гарсны дараа тэрбээр амиа хорлосон байж болзошгүй талаар мэдээлж байна.

Туркийн эрх баригчид уг хэргийг мөрдөн шалгаж эхэлсэн бөгөөд сүүлийн хоёр хоногийн хугацаанд тус улсад сургуулийн орчинд гарсан хоёр дахь удаагийн буудлагын хэрэг болсноор олон нийтийн түгшүүрийг нэмэгдүүлээд байна.

Одоогоор халдлагын шалтгаан, нөхцөл байдлыг тодруулахаар холбогдох байгууллагууд ажиллаж байна.