Киргизстан улс орон даяар Орос хэл дээрх суурин газрын нэрсийг өөрчилж, үндэсний нэршлээр солих бодлого хэрэгжүүлэхээр төлөвлөж байна. Энэ талаар Киргизийн Ерөнхийлөгч Садыр Жапаров мэдэгджээ.

Төлөвлөгөөний хүрээнд Зөвлөлтийн үеэс үлдсэн Орос нэршлүүдийг Киргиз хэл дээрх түүхэн болон уламжлалт нэрсээр солих бөгөөд уг ажлыг 2027 он гэхэд бүрэн дуусгахаар зорьж байгаа аж.

Жишээлбэл, “Военная-Антоновка” сууринг “Кожомкул”, “Семеновка”-г “Кожояр-Ата” болгон өөрчлөх санал гарчээ. Мөн цаашид суурин газрыг хувь хүний нэрээр нэрлэхийг хязгаарлах асуудлыг ч хэлэлцэж байгаа юм.

Албаны тайлбараар энэхүү өөрчлөлт нь үндэсний хэл, соёлыг хамгаалах, Зөвлөлтийн үеийн нэршлийн нөлөөг бууруулах зорилготой. Сүүлийн жилүүдэд Төв Азийн бусад орнууд ч мөн адил ижил төрлийн бодлого хэрэгжүүлэх хандлагатай байгаа билээ.