Иран хэлэлцээ хийхийг зөвшөөрч, Ормузын хоолойг нээхгүй бол Харк арал дээрх газрын тосны экспортын зангилаа, газрын тосны цооног, цахилгаан станц болон цэвэршүүлэх станцуудыг бүгдийг нь устгана гэж АНУ-ын Ерөнхийлөгч Доналд Трамп мэдэгджээ. 

Харк арал нь Персийн булангийн хойд хэсэгт оршдог, Ираны газрын тосны экспортод гол үүрэг гүйцэтгэдэг газар юм. Энэ арал руу цохилт өгвөл дэлхийн зах зээлд ноцтой хор хохирол дагуулна гэж шинжээчид үзэж байна. Харк арал 8 км орчим урттай, 4-5 км орчим өргөнтэй жижиг арал хэдий ч энд газрын тос хадгалах сав, дамжуулах хоолой, далайн ачилтын терминал зэрэг томоохон дэд бүтэц байрладаг юм. Иран улс гадаадын зах зээлд экспортолдог түүхий газрын тосны 90 орчим хувь нь Харк арлаар дамждаг аж.