Вьетнам улсад гар, хөл, амны өвчний (HFMD) дэгдэлт эрчимжиж, нас баралт бүртгэгдсэн талаар олон улсын хэвлэлүүд мэдээлж байна. Тус улсын өмнөд бүс, ялангуяа Хо Ши Мин хот-д халдварын тохиолдол огцом өссөн нь анхаарал татаж байна.

Орон нутгийн халдварт өвчний хяналтын байгууллагын мэдээлснээр 2026 оны эхнээс хойш зөвхөн Хо Ши Мин хотод 7 мянга гаруй тохиолдол бүртгэгдэж, дор хаяж гурван хүн нас баржээ. Харин улсын хэмжээнд гар, хөл, амны өвчний халдвар 25 мянга давж, нас баралт дөрөв хүрсэн талаар эх сурвалжууд онцолсон байна.

Эмч, мэргэжилтнүүдийн үзэж байгаагаар энэ удаагийн дэгдэлтэд Enterovirus 71 вирус голлон нөлөөлж байгаа бөгөөд уг вирус нь өвчний хүнд хэлбэрийг үүсгэж, бага насны хүүхдүүдэд тархи, мэдрэлийн тогтолцооны хүндрэл өгөх эрсдэлтэй аж.

Вьетнамын Эрүүл мэндийн яамнаас орон даяар урьдчилан сэргийлэх арга хэмжээг чангатгаж, сургууль, цэцэрлэгүүдэд халдвар хамгааллын дэглэмийг мөрдүүлэхийг үүрэг болгожээ. Мөн эцэг эхчүүдийг хүүхдийн ариун цэвэр, гар угаах дадалд онцгой анхаарахыг уриалж байна.

Гар, хөл, амны өвчин нь ихэвчлэн бага насны хүүхдүүдэд халдварладаг бөгөөд халуурах, ам, гар, хөл дээр тууралт гарах шинж тэмдгээр илэрдэг ч зарим тохиолдолд хүндэрч, амь насанд аюул учруулж болзошгүй юм.