Их Британи улс өсвөр насныхны сошиал медиа хэрэглээг хязгаарлах зорилготой туршилтыг эхлүүлээд байна. Тус улсын засгийн газар 13–17 насны 300 орчим хүүхдийг хамруулсан зургаан долоо хоногийн туршилтыг 2026 оны гуравдугаар сард эхлүүлжээ.

Энэхүү туршилтаар оролцогчдыг хэд хэдэн бүлэгт хуваан, сошиал хэрэглээг өөр өөр түвшинд хязгаарлаж байгаа юм. Тухайлбал, зарим хүүхдэд сошиал сүлжээг бүрэн хориглох, заримд нь өдөрт нэг цагийн хэрэглээний хязгаар тогтоох, мөн оройн цагаар ашиглахыг хориглох зэрэг арга хэмжээг туршиж байна.

Судалгааны хүрээнд сошиал медиа хэрэглээ өсвөр насныхны нойр, сэтгэл зүй, сурлагын үзүүлэлт болон гэр бүлийн харилцаанд хэрхэн нөлөөлж байгааг бодит нөхцөлд тодорхойлохыг зорьж байгаа аж.

Энэхүү туршилт нь 16-аас доош насныханд сошиал медиа хэрэглэхийг хуулиар хориглох боломжийг судалж буй бодлогын нэг хэсэг бөгөөд гарсан үр дүн нь цаашдын зохицуулалтад нөлөөлөх юм.

Иймд одоогоор улс даяар шууд хориг хэрэгжээгүй ч бодит туршилт эхэлсэн нь цахим орчны зохицуулалтыг чангатгах дараагийн алхам болж магадгүй байна.