ОХУ-ын газрын тосны экспортын хүчин чадлын дор хаяж 40 хувь нь Украины дроны цохилтын улмаас түр хугацаанд зогссон тухай Reuters агентлаг мэдээллээ. Тус агентлагийн тооцоолсноор өдөрт ойролцоогоор 2 сая баррель нефть экспортлох боломж саатсан нь Оросын эрчим хүчний салбарт сүүлийн жилүүдэд тохиолдсон хамгийн том доголдлуудын нэгт тооцогдож байна.

Украины тал сүүлийн өдрүүдэд ОХУ-ын газрын тос, эрчим хүчний дэд бүтцүүдийг чиглэсэн цохилтоо эрчимжүүлж, Балтын тэнгисийн эрэг дэх томоохон боомтууд болох Усть-Луга боомт болон Приморск боомт, мөн Хар тэнгисийн Новороссийск боомт орчимд халдлага үйлдсэн байна. Эдгээр боомтууд нь ОХУ-ын газрын тосны экспортын гол гарцуудад тооцогддог бөгөөд заримд нь гал гарч, нефть ачих ажиллагаа бүрэн зогссон талаар эх сурвалжууд мэдээлжээ.

Түүнчлэн Европ руу чиглэсэн томоохон шугам болох Дружба нефтийн хоолойд саатал үүссэн нь нийлүүлэлтийн тасалдлыг улам нэмэгдүүлсэн байна. Зарим танкерууд боомт дээр хүлээлтэд орж, логистикийн гинжин хэлхээ доголдсон нь экспортын урсгалыг мэдэгдэхүйц бууруулжээ.

Украины эрх баригчид эдгээр цохилтыг ОХУ-ын дайны санхүүжилтийн гол эх үүсвэр болсон эрчим хүчний салбарт дарамт үзүүлэх зорилготой гэж мэдэгдсэн. Харин Оросын тал хохирлын хэмжээг албан ёсоор бүрэн баталгаажуулаагүй ч зарим байгууламжид гарсан гал, эвдрэлийг хүлээн зөвшөөрсөн байна.