БНСУ-ын Хууль зүйн яам хууль бусаар ажиллаж буй гадаадын хүргэлтийн жолооч нарт арга хэмжээ авна. Өмнөд Солонгосын Хууль зүйн яам хууль бусаар хоол хүргэлтийн жолоочоор ажиллаж буй гадаадын иргэдийн тоо нэмэгдэж байгаатай холбоотойгоор хоёр сарын хугацаанд өргөн хүрээтэй шалгалт явуулах болсноо даваа гарагт мэдэгдлээ. Яамнаас 3, 4-р сарыг “эрчимжүүлсэн хяналт шалгалтын хугацаа” гэж зарласан байна. Сүүлийн үед зарим гадаад оюутнууд бусдын Солонгос иргэний мэдээллийг зээлэх эсвэл хуурамчаар ашиглан хүргэлтийн жолоочоор ажиллаж байгаа нь дотоодын иргэдийн ажлын боломжид нөлөөлж болзошгүй гэж үзэж байгаа юм.

Томоохон хүргэлтийн платформууд болох Baedal Minjok (Baemin) болон Coupang Eats зэрэг нь ихэвчлэн хүргэлтийн жолоочдыг хувийн хүргэлтийн агентлагуудаар дамжуулан ажилд авдаг. Зарим агентлагууд гадаадын иргэдийг бараг дангаар нь ажилд авч мөн илүү өндөр шимтгэл авдаг байж болзошгүй гэж яамнаас мэдээлжээ. Мөн гадаад хүргэлтийн ажилчид ихэнхдээ даатгалд хамрагдаагүй  байдаг. Тэд өндөр шимтгэл төлж, бага хөлсөөр ажиллахыг зөвшөөрдөг нь энэ салбарын дундаж орлогыг бууруулах  эрсдэлтэй гэж салбарын төлөөлөгчид хэлж байна. Энэхүү шалгалт 3-р сарын 9-нөөс 4-р сарын 30 хүртэл нийт 53 хоног үргэлжилнэ. Хууль бусаар ажиллаж буй гадаадын иргэдийг илрүүлбэл торгууль ногдуулах эсвэл албадан гаргах арга хэмжээ авч болзошгүй.

Мөн өөрийн хүргэлтийн платформын аккаунтыг гадаадын жолооч нарт зээлдүүлсэн Солонгос иргэд эрүүгийн хариуцлага хүлээх боломжтой гэж яам анхааруулжээ.