Дэлхийн нефть, байгалийн хий дамжуулалтын стратегийн чухал бүс болох Ормузад /Strait of Hormuz/ сүүлийн өдрүүдэд зэвсэгт халдлага гарч, 10 гаруй хөлөг онгоц довтолгоонд өртсөн талаар гадаадын хэвлэл мэдээллийн хэрэгслүүд мэдээлж байна.

Ираны талаас хийсэн мэдэгдэлд дурдсанаар, тус улсын Зэвсэгт хүчний харьяа Islamic Revolutionary Guard Corps (IRGC) стратегийн бүсээр нэвтрэхийг оролдсон хөлөг онгоцуудад цохилт өгсөн бөгөөд “10-аас дээш танкер болон тээврийн хөлөг ажиллагааны чадвараа алдсан” гэжээ. Гэвч уг мэдээллийг хараат бус эх сурвалжууд бүрэн баталгаажуулаагүй байна.

Олон улсын тэнгисийн аюулгүй байдлын байгууллагуудын мэдээлснээр, хэд хэдэн хөлөг онгоц пуужин болон тодорхойгүй гаралтай тэсрэх төхөөрөмжийн цохилтод өртөж, заримд нь гал гарсан байна. Зарим багийн гишүүдийг бүс нутгийн орнуудын тэнгисийн цэргийн хүчнүүд авран хамгаалсан тухай мэдээлэл гарчээ.