Өмнөд Судан Улсад энхийг сахиулж буй Монгол Улсын Зэвсэгт хүчний 15 дугаар ээлжийн мотобуудлагын батальоныхон хамгаалалт хүсэж ирсэн иргэдийн дундаас жирэмсэн эмэгтэйг эх барьж, эх үрийг эсэн мэнд төрүүлсэн. Эх барьж авсан эмч, ахлах дэслэгч Ц.Цэрэнлхагва, сувилагч, ахлах ахлагч Б.Ууганбаатар нар бяцхан хүүд Сүбээдэй гэдэг нэр хайрлажээ.  Харин Судан бүсгүй амаржсаныхаа дараа "Миний хүүг эсэн мэнд төрүүлсэн Монгол цэрэг та нэр хайрлаач" гэсэн хүсэлтийн дагуу бяцхан хүүгийн чихэнд Монгол баатрын нэрийг шивнэж. Дайн бүртээ түүхэн ялалт авчирдаг байсан Сүбээдэй баатрын нэрийг хайрласан нь Судан бяцхан хүүгийн ирээдүй гэрэлтэй, энх тайван, аюулгүй орчинд өсөн торниж, эр зоригтой эр хүн болоорой хэмээх бэлэгдэл агуулжээ.

Эх үрийг эсэн мэнд амаржуулсан энхийг сахиулагчид буюу ахлах дэслэгч Ц.Цэрэнлхагва Зэвсэгт хүчний 334 дүгээр ангийн Эрүүл мэндийн төвийн дарга бол ахлах ахлагч Б.Ууганбаатар Зэвсэгт хүчний 150 дугаар ангийн эмчилгээний сувилагч юм. Тэд  2019 онд Афганистан Улсад хамтдаа энхийг сахиулж, 2020 онд эх орондоо төмөр замын бүтээн байгуулалтад мөн л хамтран үүрэг гүйцэтгэсэн залуус ажээ.