Орчин үеийн Ил-114-300 онгоц цаг агаарын хүнд нөхцөл, ямар ч хүйтэнд алслагдсан бүс нутгуудтай агаарын харилцаа тогтоох боломжтой. Дэлхийн бөмбөрцгийн Хойд туйлын хамгийн хүйтэн бүс нутгийн нэг болох Саха (Якут) БНУ-д бүс нутгийн зорчигч тээврийн Ил-114-300 сэнст тийрэлтэт хөдөлгүүртэй онгоцыг агаарын температурын хэт бага нөхцөлд турших хөтөлбөр амжилттай хэрэгжиж дууслаа. Тус онгоц нь Цельсийн -45 хэм хүртэлх хүйтэнд удаан хугацаанд зогссон ч үндсэн системүүд, зорчигчийн бүхээгийн тоног төхөөрөмж, гаднах гэрэлтүүлгийн хэрэгслийн хэвийн ажиллагааг хангаж чаддаг. Тухайлбал, бага температурын нөхцөлд дотоодын үйлдвэрийн хөдөлгүүрийг асаах туршилт хийж, явах эд анги, мөстөлтөөс хамгаалах болон агааржуулалтын системийн ажиллагаа, мөн онгоцны орох хаалга болон ослын гарцын найдвартай ажиллагааг шалгажээ.

Ил-114-300 онгоц нь Якутск хотын нисэх онгоцны буудлаас хэд хэдэн туршилтын нислэгийг амжилттай гүйцэтгэж, бага температурын нөхцөлд найдвартай ажиллагаагаа баталлаа. Туршилтын хөтөлбөр дууссаны дараа “Ил”-ийн мэргэжилтнүүд орон нутгийн агаарын тээврийн компаниуд болон нисэхийн эрх бүхий байгууллагуудад зориулан онгоцоо танилцуулах ажлыг зохион байгуулав. Энэ хүрээнд Ил-114-300 онгоц “Якутск” нисэх буудлаас үзүүлэх нислэг үйлдэж, “Маган” нисэх онгоцны буудлын хөөрч буух шороон замын зурвас дээр цастай үед амжилттай хөөрч, газардсан байна.