Япон улсад анимэ хэлбэрийн виртуал дүртэй (VTuber) багш нар хичээл заадаг цахим сургууль албан ёсоор байгуулагдсаныг гадаадын хэвлэлүүд мэдээллээ.

Тодруулбал, “Wish High” нэртэй энэхүү онлайн сургууль нь Японы боловсролын чиглэлийн Luminaris компанийн санаачилгаар хэрэгжиж байна. Сургалтын онцлог нь багш нар бодит хүмүүс боловч хичээлээ анимэ хэв маягийн виртуал дүрээр дамжуулан заадаг явдал юм.

Тус сургууль математик, англи хэл, физик, хими, газар зүй, түүх зэрэг суурь хичээлүүдийг бүрэн цахим орчинд явуулах бөгөөд ахлах ангийн сурагчдаас гадна насанд хүрэгчдэд ч нээлттэй аж. Сургалтын төлбөр нь нэг хичээлд ойролцоогоор 9,900 иен буюу 65 орчим ам.доллар байна.

Зохион байгуулагчдын тайлбарласнаар виртуал багш нар нь сурагчдын сонирхлыг татах, цахим орчинд хичээлд идэвхтэй оролцуулах, боловсролын хүртээмжийг нэмэгдүүлэх зорилготой. Уг сургууль нь уламжлалт ерөнхий боловсролын сургууль бус, нэмэлт сургалт, бэлтгэлийн (cram school) хэлбэрээр ажиллах юм.