ОХУ-ын дуучин SHAMAN буюу Ярослав Дронов Байгаль нуурын мөсийг долоож буй бичлэгээ олон нийтийн сүлжээнд нийтэлсний дараа Буриадын уламжлалт шүтлэгтнүүдийн дургүйцлийг хүргэжээ. Уг үйлдлийг тэд ариун дагшин газар доромжилсон хэрэг хэмээн үзэж, дуучнаас олон нийтийн өмнө уучлал гуйхыг шаардсан байна.

Буриад бөө нарын тайлбарласнаар Байгаль нуур нь зөвхөн байгалийн өв төдийгүй сүнслэг, шашин шүтлэгийн онцгой ач холбогдолтой газар бөгөөд аливаа үйлдэлд хүндэтгэлтэй хандах ёстой аж. Тиймээс мөсийг долоосон, тоглоом шоглоомын шинжтэй бичлэг нь нутгийн иргэдийн итгэл үнэмшил, соёлын үнэт зүйлд харшилсан гэж үзэж буйгаа илэрхийлжээ.

Энэ талаар Беларусийн хараат бус хэвлэл Nasha Niva болон бусад гадаад эх сурвалжууд мэдээлэхдээ, уг бичлэгийн дараа нутгийн идэвхтнүүд болон соёлын төлөөлөгчид SHAMAN-ыг шүүмжилж, зарим нь эсэргүүцлийн хэлбэрээр бэлгэдлийн үйлдэл хийсэн тухай дурдсан байна.

Харин дуучин SHAMAN өөрийн үйлдлийг хошин маягийн контент, жуулчлалын анхаарал татах зорилготой байсан хэмээн тайлбарласан ч уучлал гуйх эсэх талаар албан ёсны мэдэгдэл хийгээгүй байна.