АНУ, Ираны дараагийн шатны хэлэлцээ хоёрдугаар сарын 26-ны өдөр Женевт болно гэж Оманы Гадаад хэргийн сайд Бадр бен Хамад бен аль-Бусаиди мэдэгдлээ.

"Америк-Ираны хэлэлцээ ирэх пүрэв гарагт Женевт болохоор товлогдсон гэдгийг батлахад таатай байна" хэмээн тэрбээр Х дэх хуудсандаа бичжээ.

Үүний зэрэгцээ Ираны Гадаад хэргийн сайд Аббас Арагчи "02 дугаар сарын 26-ны өдөр Женев хотноо АНУ-ын Ерөнхийлөгчийн тусгай элч Стивен Уиткоффтой уулзан, цөмийн хэлэлцээний төслийг хэлэлцэнэ" гэж мэдэгдсэн байна.

Уг уулзалтаар Иран цөмийн хөтөлбөртэй холбоотой АНУ-ын болгоомжлолыг арилгахын тулд ОХУ зэрэг гуравдагч талд өндөр баяжуулсан ураны нөөцийн хэсгээ илгээх санал тавьсан байна. Түүнчлэн Ираны тал гурав хүртэлх жилийн хугацаатайгаар уран баяжуулалтыг зогсооход бэлэн гэсэн байр суурь илэрхийлсэн ч АНУ Ираныг цөмийн хөтөлбөрөө бүрэн зогсоохыг шаардаж байгаа аж.