Бүгд Найрамдах Солонгос Улсын Үндэсний Тагнуулын Алба /NIS/ Хойд Солонгосын удирдагч Ким Жон Ун охиноо өөрийн залгамжлагчаар бэлтгэж эхэлсэн гэсэн дүгнэлтийг парламентын гишүүдэд танилцуулсан талаар олон улсын хэвлэлүүд мэдээллээ.

Тодруулбал, БНСУ-ын тагнуулын байгууллага Ким Жон Уны охин болох Ким Жү Э-г “залгамжлалын шатанд орсон” гэж үнэлсэн байна. Энэ нь өмнөх “удирдагчаар бэлтгэгдэж байна” гэх таамгаас илүү тодорхой үнэлгээ хэмээн ажиглагчид үзэж байгаа юм.

Тагнуулын байгууллагын мэдээлснээр Ким Жү Э 2022 оноос эхлэн олон нийтийн өмнө тогтмол гарч эхэлсэн бөгөөд пуужингийн туршилт, цэргийн парад, төрийн арга хэмжээнүүдэд эцгийнхээ хамт оролцож байгаа нь түүний улс төрийн байр суурийг бэхжүүлж буй дохио гэж үзжээ.

Гэхдээ энэ нь Хойд Солонгосоос албан ёсоор зарласан шийдвэр биш бөгөөд БНСУ-ын тагнуулын байгууллагын дүгнэлт гэдгийг онцолж байна. Одоогоор Пёньян залгамжлалын талаар ямар нэгэн албан ёсны мэдэгдэл хийгээгүй байна.