АНУ-ын “Today” шоуны хөтлөгч Саванна Гутригийн 84 настай ээж Нэнси Гутри Аризона мужийн Тусон хот дахь гэрээсээ сураггүй болсон талаар АНУ-ын хууль хяналтын байгууллагууд мэдээллээ. Уг хэргийг хүний хулгай байж болзошгүй гэж үзэн мөрдөн шалгах ажиллагаа явуулж байна.

Пима тойргийн шерифийн албаны мэдээлснээр Нэнси Гутриг нэгдүгээр сарын 31-ний орой гэртээ байсан бөгөөд түүнээс хойш холбоо тасарсан байна. Түүний гар утас, автомашин болон өдөр тутам хэрэглэдэг эм, хувийн эд зүйлс гэртээ үлдсэн байжээ. Гэрийг нь “хэрэг гарсан газар” хэмээн хамгаалалтад авч, шинжээчид ажиллаж эхэлсэн байна. Урьдчилсан байдлаар хүч хэрэглэсэн байж болзошгүй шинж тэмдэг илэрсэн тухай орон нутгийн албаныхан мэдэгдсэн ч сэжигтэн этгээдийг одоогоор тогтоогоогүй байна.

Мөрдөн шалгах ажиллагаанд Холбооны мөрдөх товчоо оролцож байгаа бөгөөд ойр орчмын хяналтын камерын бичлэг, хөршүүдийн мэдээлэл зэргийг шалгаж байна. Албаныхан Нэнси Гутриг өөрийн хүсэлтээр явсан гэх үндэслэл одоогоор байхгүй гэж мэдэгджээ.

Саванна Гутри болон түүний гэр бүлийнхэн олон нийтэд хандан мэдээлэл өгөхийг уриалж, ээжийнхээ аюулгүй байдлын талаарх ямар нэгэн баттай мэдээлэл авахыг хүсч буйгаа илэрхийлсэн байна. Тэрбээр “эхийг минь харсан, сонссон, байршлын талаар мэдээлэлтэй хэн бүхэн цагдаагийн байгууллагад яаралтай хандана уу” хэмээн мэдэгдсэн талаар АНУ-ын томоохон хэвлэлүүд дамжуулжээ.

Одоогийн байдлаар Нэнси Гутри олдоогүй байгаа бөгөөд хэрэг үргэлжлэн шалгагдаж байна. Хууль хяналтын байгууллагууд иргэдийг баталгаагүй мэдээлэл тараахгүй байхыг, харин бодитой мэдээлэл байвал албан ёсны сувгаар өгөхийг уриалж байна.