Коста Рика улсад 2026 оны хоёрдугаар сарын 1-нд болсон ерөнхийлөгчийн сонгуулиар 39 настай Лаура Фернандес ялалт байгуулж, тус улсын төрийн тэргүүнээр сонгогдлоо. Урьдчилсан дүнгээр тэрбээр эхний шатанд 48 орчим хувийн санал авч, дахин санал хураалт явуулах шаардлагагүйгээр шууд ялсан талаар олон улсын хэвлэлүүд мэдээлжээ.

Лаура Фернандес нь эрх баригч намын нэр дэвшигч бөгөөд өмнө нь төрийн өндөр албан тушаал хашиж байсан туршлагатай улс төрч юм. Тэбрээр сонгуулийн кампанит ажлынхаа үеэр гэмт хэрэг, хар тамхины бүлэглэлтэй тэмцэх, аюулгүй байдлыг бэхжүүлэх, эдийн засгийн тогтвортой өсөлтийг хангах бодлого баримтална гэдгээ онцолсон байна. Сүүлийн жилүүдэд Коста Рикад гэмт хэргийн түвшин өссөн нь сонгогчдын гол анхаарлын асуудал болоод байсан юм.

Түүний өрсөлдөгч Алваро Рамос ялагдлаа хүлээн зөвшөөрч, ардчилсан шилжилтийг хүндэтгэнэ гэдгээ мэдэгдсэн байна. Олон улсын удирдагчид, тэр дундаа АНУ болон Европын Холбооны төлөөлөгчид Ерөнхийлөгчөөр сонгогдсонд нь баяр хүргэсэн талаар гадаадын хэвлэлүүд мэдээлжээ.

Лаура Фернандес тавдугаар сарын 8-нд албан ёсоор тангараг өргөж, үүрэгт ажлаа эхлүүлэх бөгөөд Коста Рикагийн түүхэнд сонгогдсон хоёр дахь эмэгтэй Ерөнхийлөгч болж байна. Түүний засаглал бүс нутгийн улс төр, аюулгүй байдлын бодлогод хэрхэн нөлөөлөх нь олон улсын анхаарлын төвд байна.