Монгол Улс 2025 оны Global Peace Index (GPI) буюу Дэлхийн энх тайвны индексийн тайланд Ази тивийн хамгийн тайван, аюулгүй орнуудын эхний тавд багтсан талаар гадаадын хэвлэл мэдээллийн хэрэгслүүд мэдээллээ.

Уг индексийг Австралид төвтэй Institute for Economics and Peace (IEP) байгууллага жил бүр гаргадаг бөгөөд дэлхийн 160 гаруй орныг нийгмийн аюулгүй байдал, дотоод болон гадаад мөргөлдөөний түвшин, цэрэгжилтийн үзүүлэлт зэрэг 20 гаруй шалгуураар үнэлдэг байна.

2025 оны тайланд Монгол Улс Азийн орнуудын дунд 5 дугаар байрт эрэмбэлэгдсэн талаар олон улсын мэдээллийн сайтууд онцолжээ.

Жагсаалтыг Сингапур тэргүүлж, удаах байруудад Япон, Малайз, Бутан бичигдсэн бол Монгол Улс тэдний араас жагссан байна. Тайланд дурдсанаар Монгол Улс нь бүс нутгийн хэмжээнд харьцангуй тогтвортой улс төрийн орчин, гадаад зөрчилдөөн багатай байдал, нийгмийн аюулгүй байдлын үзүүлэлтээрээ давуу үнэлгээ авчээ.

Global Peace Index нь дэлхий даяар энх тайвны түвшинг харьцуулан судалдаг нэр хүндтэй судалгаанд тооцогддог бөгөөд жил бүр олон улсын хэвлэлүүд тайлангийн үр дүнг иш татан мэдээлдэг.