АНУ-ын өмнөх ерөнхийлөгчид болох Барак Обама болон Билл Клинтон нар Доналд Трампын засаг захиргааны зарим бодлого, үйл ажиллагааг шүүмжилж, ард иргэдийг ардчиллын үнэт зүйлсээ хамгаалж, дуу хоолойгоо илэрхийлэхийг уриалж эхэлжээ.

Тэдний мэдэгдэл АНУ-ын Миннеаполис хотод холбооны цагаачлалын албаны ажиллагаатай холбоотойгоор хоёр хүн амь насаа алдсан хэргийн дараа гарсан байна. Уг хэрэг олон нийтийн дунд маргаан дагуулж, холбооны байгууллагуудын үйл ажиллагаанд хяналт, хариуцлага шаардсан эсэргүүцэл зарим хотод өрнөжээ.

Барак Обама уг үйл явдлыг “Америкийн нийгэмд сэрэмжлүүлэг болсон эмгэнэлт хэрэг” хэмээн тодорхойлж, намын харьяаллаас үл хамааран иргэд үндсэн эрх, эрх чөлөөгөө хамгаалах ёстойг онцолсон байна. Харин Билл Клинтон иргэдийг “чимээгүй байж болохгүй” хэмээн уриалж, ардчиллын суурь зарчим алдагдаж болзошгүйг анхааруулжээ.

Олон улсын хэвлэлүүдийн мэдээлснээр, дээрх мэдэгдлүүд нь Трампын засаг захиргааны баримталж буй хатуу цагаачлалын бодлоготой холбоотой шүүмжлэлийг улам нэмэгдүүлж, улс төрийн маргааныг хурцатгаад байна.