Өчигдөр /2025.12.24/ Бүгд Найрамдах Солонгос Улсын нийслэл Сөүл хотын Ганнам дүүрэгт Монгол Улсаас тус улсад суугаа Элчин сайдын яамны 001 дугаартай албаны автомашин зам тээврийн осол гаргасан хэрэг бүртгэгдсэн байна. Ослын улмаас нэг хүн гэмтэж, эмнэлгийн тусламж авсан талаар орон нутгийн хэвлэл мэдээлсэн байна.

Уг автомашиныг жолоодож явсан этгээд нь Монголын Элчин сайдын яамны ажилтан бөгөөд согтууруулах ундаа хэрэглэсэн үедээ тээврийн хэрэгсэл жолоодож явсан нь Солонгосын цагдаагийн байгууллагын анхан шатны шалгалтаар тогтоогдсон гэж мэдээлжээ. Цагдаагийн байгууллагаас түүний согтуурлын түвшинг хэмжихэд жолооны үнэмлэх цуцлагдах хэмжээнд хүрсэн үзүүлэлт илэрсэн байна.

Осол болсон даруйд Ганнам дүүргийн цагдаагийн газар хэргийг шалгаж эхэлсэн бөгөөд согтуугаар тээврийн хэрэгсэл жолоодсон, бусдад гэмтэл учруулсан зэрэг үндэслэлээр мөрдөн шалгах ажиллагаа явуулж байгаа аж. Тус хэрэгт дипломат статустай тээврийн хэрэгсэл холбогдсон ч жолооч хувь хүний хариуцлагын асуудлыг Солонгосын хууль тогтоомжийн дагуу шалгана гэдгийг эх сурвалжууд онцолжээ.

Энэ талаар Монгол Улсаас БНСУ-д суугаа Элчин сайдын яам болон Гадаад харилцааны яамнаас одоогоор албан ёсны тайлбар мэдэгдэл хийгээгүй байна.