ОХУ-ын нийслэл Москва хотод автомашины доор байрлуулсан тэсрэх төхөөрөмж дэлбэрсний улмаас Оросын армийн өндөр тушаалын генерал амиа алдсан талаар гадаадын томоохон мэдээллийн агентлагууд мэдээллээ. ОХУ-ын Мөрдөн байцаах хорооны мэдэгдснээр уг халдлага 2025 оны арванхоёрдугаар сарын 22-ны өглөө хотын өмнөд хэсэгт гарсан бөгөөд хохирогч нь Ерөнхий штабын Үйл ажиллагаа, сургалтын газрын дарга, хошууч генерал Фанил Сарваров байжээ. 

Reuters агентлагийн мэдээлснээр тэсрэх төхөөрөмжийг генералын унаж явсан автомашины доор урьдчилан байрлуулсан байсан бөгөөд түүнийг хөдөлмөгц дэлбэрэлт болсон байна. Дэлбэрэлтийн улмаас генерал газар дээрээ нас барж, ойролцоох барилга, автомашинууд мөн эвдэрч сүйдсэн гэж эх сурвалжууд мэдээлжээ. 

ОХУ-ын хууль, хяналтын байгууллагууд уг хэргийг зохион байгуулалттай аллага хэмээн үзэж, терроризмын шинжтэй байж болзошгүй гэж мөрдөн шалгаж эхэлсэн байна. Мөн мөрдөн шалгах ажиллагааны хүрээнд Украины тусгай албадтай холбоотой байж магадгүй гэх хувилбарыг үгүйсгэхгүй байгаа ч одоогоор энэ талаар нотлох баримт ил болоогүй байгаа аж. Украины тал уг хэрэгт холбоотой гэх мэдээллийг албан ёсоор батлаагүй байна

Гадаадын хэвлэлүүдийн мэдээлснээр сүүлийн нэг жилийн хугацаанд Москва болон ОХУ-ын бусад хотуудад цэргийн өндөр албан тушаалтнуудыг онилсон тэсрэх бодистой халдлагууд давтамжтай гарч байгаа нь Орос-Украины дайны хүрээнд аюулгүй байдлын нөхцөл байдал хурцдаж буйн илрэл хэмээн шинжээчид дүгнэж байгаа юм.