Германы инженер Михаэла Бентхаус түүхэнд анх удаа тэргэнцэртэй сансарт ниссэн хүн болсон талаар олон улсын хэвлэл мэдээллээ. Тэрбээр АНУ-ын Blue Origin компанийн New Shepard пуужингаар хөөрсөн богино хугацааны сансрын нислэгт оролцож, дэлхийн агаар мандлын зааг болох Карманы шугарыг давсан байна.

Мэдээлснээр, нислэг АНУ-ын Техас мужийн баруун хэсгээс хөөрч, нийтдээ ойролцоогоор 10 минут үргэлжилсэн бөгөөд энэ хугацаанд жингүйдлийн орчинд орж, дэлхийг сансраас харах боломж бүрджээ. Ингэснээр Михаэла Бентхаус нь "сансарт ниссэн анхны тэргэнцэртэй хүн" хэмээх түүхэн амжилтын эзэн болсон байна.

Тэрбээр инженер мэргэжилтэй бөгөөд өмнө нь сансар судлалын салбарт ажиллаж байсан туршлагатай нэгэн аж. Түүний хувьд долоон жилийн өмнө уулын дугуйн ослоор хүнд гэмтсэн гэнэ. 

Хэвлэлд өгсөн ярилцлагадаа тэр “Сансар бол цөөн хүний мөрөөдөл биш. Хөгжлийн бэрхшээлтэй хүмүүс ч мөн адил шинжлэх ухаан, судалгаа, сансрын салбарт оролцох бүрэн боломжтой” хэмээн онцолжээ.

Олон улсын хэвлэлүүд уг нислэгийг сансрын аяллын хүртээмжийг нэмэгдүүлэх, хөгжлийн бэрхшээлтэй иргэдийн оролцоог бодитоор харуулсан чухал алхам гэж дүгнэж байна. Энэхүү үйл явдал нь ирээдүйд сансар судлал, арилжааны сансрын нислэгүүд илүү хүртээмжтэй болох боломжийг нээж өгч буй бэлгэдэлт ач холбогдолтой гэж шинжээчид онцолжээ.