Хятадын Жянсу мужид үйл ажиллагаа явуулдаг нэгэн компанийн гэрээт ажилтныг ажлын цагаар ариун цэврийн өрөөнд хэтэрхий удаан хугацаа зарцуулсан үндэслэлээр ажлаас нь халсан шийдвэрийг шүүх хууль ёсны гэж үзжээ.

Хонконгийн “South China Morning Post” (SCMP) сонинд мэдээлснээр, Ли овогт уг ажилтан нэг сарын хугацаанд ажлын цагаар нийт 14 удаа ариун цэврийн өрөөнд орж, нэг удаадаа дунджаар нэг цаг орчим хугацаа зарцуулсан байна. Компанийн зүгээс үүнийг ажлын сахилга, дотоод журмыг ноцтой зөрчсөн гэж үзэн гэрээг нь цуцалжээ.

Ли шүүхэд хандаж, эрүүл мэндийн шалтгаантай байсан хэмээн тайлбарлаж, хууль бусаар халагдсан гэж маргасан бөгөөд нөхөн төлбөр нэхэмжилсэн байна. Гэвч шүүх компанийн дотоод дүрэм, ажилтны ажлын цагийн хяналтын баримтуудыг үндэслэн, уг ажилтан ажлын байраасаа зөвшөөрөлгүйгээр удаа дараа, урт хугацаагаар эзгүйрсэн нь нотлогдсон гэж дүгнэжээ. Иймд түүнийг ажлаас халсан нь хууль зөрчөөгүй, үндэслэлтэй шийдвэр гэж үзсэн байна.

Энэхүү шийдвэр нь Хятадад ажлын сахилга, хөдөлмөрийн дотоод журам ямар өндөр шаардлагатай байдгийг харуулсан жишээ хэмээн гадаадын хэвлэлүүд онцолжээ. SCMP-ийн мэдээлснээр, уг хэрэг олон нийтийн анхаарлыг татаж, хөдөлмөрийн эрх, ажилтны эрүүл мэндийн асуудлын талаарх маргааныг дахин хөндсөн байна.