Австралийн Сидней хотын Бондай далайн эрэг дээр болсон зэвсэгт халдлагын үеэр буутай этгээд рүү ямар ч зэвсэггүйгээр гүйж очин ноцолдож, бууг нь салгаж авснаар олон хүний амийг аварсан зоригт эрийн талаар дэлгэрэнгүй мэдээлэл ил болжээ. Түүнийг Ахмед ал Ахмед гэдэг бөгөөд 43 настай, хоёр хүүхдийн аав, Сидней хотын Саттерланд ширайр дүүрэгт жимс, ногооны жижиг дэлгүүр ажиллуулдаг энгийн бизнес эрхлэгч аж.

Халдлага гарсан мөчид хүмүүс айж сандарч зугтаж байхад Ахмед олны зүг гал нээж байсан зэвсэгт этгээдийг хармагцаа амь насаа үл хайхран түүн рүү гүйж очиж, ар талаас нь барьж авч, газарт унагаан бууг нь салгаж авахын төлөө тэмцсэн байна. Камерын бичлэгт түүнийг халдагчтай газар дээр ноцолдож, бууг нь хол шидэж буй агшин тодорхой харагддаг бөгөөд албаныхны зүгээс түүний энэ үйлдэл дахин олон хүн буудуулах эрсдэлийг таслан зогсоосон гэж дүгнэжээ.

Гэвч тэрбээр зэвсэгт этгээдийг зогсоох явцдаа өөр нэг халдагчийн суманд оногдож, гар болон мөрөндөө хоёр удаа буудуулсан байна. Яаралтай эмнэлэгт хүргэгдэн мэс засалд орсон бөгөөд одоогоор биеийн байдал нь тогтвортой, амь насанд аюулгүй болсон талаар эмч нар мэдээлсэн байна.

Ахмед ал-Ахмед нь мэргэжлийн цэргийн хүн бус, ямар нэгэн тусгай бэлтгэлгүй жирийн иргэн бөгөөд гэр бүлийнхнийх нь хэлснээр “бусдын амь нас аюулд орж байгааг хараад зүгээр хараад зогсож чадаагүй” учраас ийм шийдвэр гаргасан аж. Түүний зоригт үйлдлийг Австралийн Ерөнхий сайд болон орон нутгийн удирдлагууд өндрөөр үнэлж, жинхэнэ баатар хэмээн нэрлэсэн байна.

Энэхүү халдлагыг хууль, хүчний байгууллагууд терроризмын шинжтэй байж болзошгүй хэмээн үзэн шалгаж байгаа бөгөөд хэрэгтэй холбоотой мөрдөн шалгах ажиллагаа үргэлжилж байна. Бондай далайн эрэг дээрх энэ хэрэг Австралид сүүлийн жилүүдэд гарсан хамгийн олон нийтийг цочроосон зэвсэгт халдлагын нэгээр нэрлэгдэж байгаа юм.