Өнгөрсөн шөнө 23:15 цагийн орчимд Аомори мужийн зүүн эргээс холгүй газар 7.5 магнитудын хүчтэй газар хөдөлсөн бөгөөд мягмар гарагийн өглөө Япон улс Хоккайдо, Аомори, Иватэ мужийн эрэг орчимд зарласан цунамигийн анхааруулгыг бүхэлд нь цуцаллаа. Мөн цунамигийн өндөр нь 3 метр хүрч болзошгүй гэж анхааруулжээ.

NHK-ийн мэдээлснээр зарим бүс нутагт 70 см өндөртэй давалгаа бүртгэгдсэн тул анхны цунамигийн сэрэмжлүүлгийг мягмар гарагийн өглөө “зөвлөмж” болгон бууруулжээ. Гэсэн ч цаг уурын агентлаг тухайн бүс нутагт дахин хүчтэй доргилт болох магадлалтай тул иргэдийг анхаарал болгоомжтой байхыг сануулсан байна.

Засгийн газрын ерөнхий нарийн бичгийн дарга Минору Кихара хүн амын хохирол болон эд хөрөнгийн гэмтлийн талаар мэдээлэл цуглуулж эхэлсэн бөгөөд Ерөнхий сайдын ажлын албанд онцгой байдлын штаб байгуулсан гэв. Тэрбээр “Ерөнхий сайдын үүрэг чиглэлийн дагуу бид бүх нөөц боломжоо ашиглан хохирлын үнэлгээ, эрэн хайх–аврах ажиллагаа, онцгой байдлын тусламжийн арга хэмжээнүүдийг хүний амь насыг нэн тэргүүнд тавин хэрэгжүүлж байна” гэж мэдэгдэв.

Олон улсын Атомын энергийн агентлаг ч мөн Японоос мэдээлэл авч, Фүкүшима-1 станцыг багтаасан бүх цөмийн байгууламж хэвийн ажиллаж байгаа талаар нийтэлжээ. Гэвч урьдчилан сэргийлэх үүднээс Фүкүшима станцын боловсруулах аргаар цэвэрлэсэн усыг түр хугацаанд цутгалтаас зогсоосон байна.