“Netflix” компани “Warner Bros Discovery” компанийн кино энтертайнмент салбарын бизнесүүдийг 72 тэрбум ам.доллароор худалдаж авахаар тохирсон байна.

“Comcast”, “Paramount” зэрэг компаниуд дуудлага худалдаанд өрсөлдсөнөөс стриминг үйлчилгээний аварга “Netflix” шалгарсан.  DC, Harry Potter, Game of Thrones зэрэг франчайз эрхүүдийг эзэмшдэг WB компани Netflix-тэй нэгдэх нь медиа салбарт монополын хэмжээнд хүрэхгүй ч зах зээлийн ихээхэн хувийг эзлэх нь тодорхой. Энэ талаар Доналд Трамп ням гарагт Вашингтонд болсон хүлээн авалтын үеэр Netflix зах зээлийг ихээр эзэлдэг тул 2 фирмүүд нэгдэх нь “асуудал болно” гэж хэлсэн байна.  

АНУ-ын Хууль зүйн яамны Өрсөлдөөний хэлтэс нь нийлж буй бизнесүүд стриминг зах зээлийн хэт их хувийг эзэлдэг тул энэ гэрээ хууль зөрчсөн гэж үзэж магадгүй юм. АНУ-ын нийслэл дэх Жон Кеннедигийн төвд болсон арга хэмжээний үеэр Трамп Netflix нь "маш том зах зээлд эзлэх хувьтай" бөгөөд хэрвээ хэлэлцээр амжилттай болбол "улам их өснө" гэж мэдэгджээ. Трамп хэлэлцээрийг батлах эсэх талаар шийдвэр гаргахад биечлэн оролцох болно гэдгээ нэмж хэлээд Netflix-ийн зах зээлд эзлэх хувь хэмжээг удаа дараа онцлон тэмдэглэв. Мөн тэрбээр саяхан Netflix-ийн гүйцэтгэх захирал Тед Сарандосыг магтаж Зууван оффист зочилсон талаар хэлсэн байна.  "Би түүнийг маш их хүндэлдэг. Тэр бол агуу хүн....Тэр киноны түүхэн дэх хамгийн агуу ажлуудын нэгийг хийсэн" гэж Трамп хэлжээ.