Зүүн Өмнөд Азийг хамарсан хүчтэй шуурга, аадар бороо, хөрсний гулгалт, үерийн цуваа гамшгийн улмаас амь үрэгдсэн хүний тоо 800-д хүрсэн тухай олон улсын хэвлэлүүд мэдээлэв. Индонез, Шри Ланка, Тайланд, Малайз зэрэг орнуудад хэд хоног үргэлжилсэн агаарын экстрем үзэгдлийн дараа сүйрлийн хэмжээ улам тодорч, хохирлын тоо баримт өдөр ирэх тусам нэмэгдэж байна.

Индонезид хамгийн их хохирол бүртгэгдсэн бөгөөд 600 гаруй хүн амь үрэгдсэн, 400 гаруй хүн сураггүй байгаа талаар аврах багууд мэдээлжээ. Хүчтэй борооны улмаас уулын бүсэд хөрсний нуралт үүсч, олон тосгон бүхэлдээ газрын хөрснөөс арчигдсан байна. Тайландын хойд хэсэгт 170 гаруй хүн амиа алдаж, Малайзад хэд хэдэн муж үерт автсаны улмаас хүний амь эрсджээ. Зарим бүсэд гүүр, зам эвдэрч, усан төвшин өндөр хэвээр байгаагаас аврах ажиллагаа хүндрэлтэй үргэлжилж байна.

Гамшгийн голомтод онцгой нөхцөл байдал зарлаж, цэргийн хүч, нисдэг тэрэг, аврах ангиудыг дайчлан нүүлгэн шилжүүлэлт, эрэн хайх ажиллагаа явуулж байгаа ч олон газарт хүрэлцэхгүй хэвээр. Сүүлийн хэдэн хоногт аврагдсан хүмүүсийн олонх нь хүнс, ундны усгүй, эмнэлгийн тусламж авах боломжгүй нөхцөлд хэдэн өдөр хүлээсэн болох нь тодров.

Цаг уурын шинжээчид энэ удаагийн гамшгийг бүс нутагт сүүлийн жилүүдэд давтамжтай болсон “экстрем” үзэгдлийн нэг гэж онцолж байна. Тропикийн бүсэд далайн усны температур хэвийн түвшнээс огцом нэмэгдсэн нь шуурганы хүч нэмэгдэхэд нөлөөлсөн бөгөөд уур амьсгалын өөрчлөлттэй холбоотой эрсдэл өссөөр буйг анхааруулжээ.

Бүс нутгийн эрх баригчид гамшгийн дараах сэргээн босголтын ажил хэдэн сар үргэлжлэх бөгөөд олон осолдож, үерт автсан бүсүүдийг дахин хэвийн болгоход жилээс ч илүү хугацаа шаардлагатай гэж үзэж байна. Олон улсын байгууллагууд хүмүүнлэгийн тусламж үзүүлэхээ мэдэгдэж, НҮБ онцгой байдлын баг илгээхээр бэлтгэлдээ оржээ.