Ерөнхийлөгч Дональд Трампын засгийн газраас Төрийн департаментын консулын албаныханд шинэ удирдамж илгээж, виз олгохдоо гадаадын иргэдийн эрүүл мэндийн байдлыг илүү нарийн үнэлэхийг даалгасан талаар хэд хэдэн гадаад эх сурвалж мэдээллээ. Тодруулбал, таргалалт, зүрхний өвчин, чихрийн шижин, хорт хавдар зэрэг урт хугацааны эмчилгээ шаарддаг архаг өвчинтэй хүмүүсийг визийн шийдвэр гаргахдаа харгалзан үзэх чиглэл багтжээ.

Энэ өөрчлөлт нь АНУ-ын “public charge” буюу ирээдүйд төрөөс санхүүгийн тусламж авах магадлалыг тооцдог бодлогын хүрээнд хамаарах бөгөөд консулын ажилтнууд тухайн хүний өвчлөлөөс улбаалан өндөр эмчилгээний зардал гарах эсэх, мөн өөрийгөө санхүүжүүлэх чадвартай эсэхийг хамтад нь үнэлэх шаардлагатай болж байна.

Гэсэн ч уг удирдамж нь бүх өвчтэй хүнийг автомат байдлаар татгалзах журам биш. Хүсэлт бүрийг тусад нь үнэлж, тухайн хүний эрүүл мэнд, санхүүгийн чадавх, визийн зорилго зэрэг хүчин зүйлсийг нэгтгэн шийдвэр гаргана гэж эх сурвалц онцолжээ.

Шинэ журам 2026 оноос хэрэгжиж эхлэх боломжтой гэж хэвлэлүүд мэдээлсэн ба шинжээчид үүнийг визийн шалгуурыг чангатгах алхам хэмээн үзэж байна.