Барон Ро́берт-Ни́колай-Максими́лиан Рома́н Фёдорович фон У́нгерн-Ште́рнберг бол Монголын 20-р зууны эхэн үеийн түүхтэй салшгүй холбоотой нэгэн. Түүний монархист, анти-коммунист үзэл социализмын үед бидний дайсан гэх ойлголтой байсан бол 1921 онд Монгол орныг гамин цэргээс бүрэн чөлөөлсөн гавьяаг ардчиллаас хойш дурдаж эхэлсэн. Гэвч түүний харгислалыг аль ч цаг үед хүлээн зөвшөөрөхгүй л болов уу.

Тэгвэл түүний удмын Леони фон Унгерн-Штернберг өвгийнхөө талаар Тик Ток хийж олны анхааралд өртөж байна. Пан-Монголын эзэнт гүрнийг цогцлоож Москва дах Зөвлөлтийн дэглэмийг түлхэн унагах зорилготой байсан Барон Унгернийг “Монголын сүүлийн хаан” гэх буруу ойлголт зарим интернэт хэрэглэгчдийн дунд түгээд байна.

Богд хаанаас Хан, Дархан хошой чин вангийн хэргэм шагнасан тухай зарлиг

Шашин төрийг хослон баригч, наран гэрэлт, түмэн наст Богд хааны зарлиг

Орос жанжин генарал Барон болбоос бидний Монголын өөрийн эзэрхэх засгийн газрыг дахин байгуулах хэрэгт тэргүүлэн чармайн зүтгэсэн гавъяа бүхий хүмүүн мөн. Түүний бие анх цэрэг авч ирснээс инагш хүйтэн жихүүнд халшрал хийхгүй, олон ардыг өчүүхэн төдий гаслагсангүй, эцэстэл зоригийг хатуужин явсаар нэгэн өглөөний зуур Хүрээний газрыг байлдан авч гавъяа бүтээсэн ба шан хорыг тэгшлэн, цэргийн цаазыг явуулсанийг үзвээс үнэхээрийн тодорхой чанга хэмээвээс болмой. Тиймийн тул би бээр их л сайшаан үзэж, генарал Баронд үе улиран ханы зэрэг, дархан хошой чин вангийн хэргэм, ногоон жууз, улбар шар хүрэм, шар жолоо, гурван нүдэт тогосын отог, улсыг мандуулагч их баатар жанжин цол шагнавай. Хойч өдөр үе улиран тасрал үгүй залгамжлуулагтун. Иймийн тул шар торгоны өргөмжлөлд эрдэнэ дарж олговой.                    -Олноо Өргөгдсөний арваннэгдүгээр он

Та бидний мэдэж буйгаар Богд Хаант Монгол улсын үед хан цол бол аймаг удирдах хэмжээний цол байсан нь Леонигийн фенүүдийн бодсон шиг төрийн тэргүүний суудал биш юм. Тэгвэл 29 настай бүсгүйн бичлэгүүдэд “Монголын хаан ширээг та буцааж авах хэрэгтэй” зэрэг олон сэтгэгдэл ирсэн байна. Үүнд Леони фон Унгерн-Штернберг “би чинь зүгээр л матча уудаг охин шүүдээ” хэмээн хошигнон хариулжээ. Тэрбээр 18 настайгаасаа хойш ажил хийж байгаа бөгөөд өөрийгөө их даруухан өссөн гэжээ. Одоогоор Испани улсад амьдардаг бөгөөд мастерын зэргээ авахаар суралцаж буй оюутан гэнэ.