Японы 32 настай “Кано” гэх эмэгтэй өөрийн бүтээсэн хиймэл оюуны дүртэй бэлгэдлийн гэрлэлтийн ёслол хийсэн нь олон улсын хэвлэл мэдээллийн анхаарлыг татав. Тэрбээр ChatGPT ашиглан “Клаус” нэртэй дижитал нөхөр бүтээж, түүнд зан төлөв, дуу хоолой, харилцааны хэв маягийг тохируулан удаан хугацаанд “амраг” болохоор ярилцаж иржээ.

Ёслол нь бодит тайз засал, AR технологийг хослуулсан хэлбэрээр болж, өргөтгөсөн бодит байдлын тусламжтайгаар “Клаус”-ын дүр түүний хажууд харагдаж байсан байна. Хэдийгээр ёслол бодитоор явагдсан ч Японы хуулиар хиймэл оюунтай гэрлэх боломжгүй тул энэ нь албан ёсны бус, зөвхөн бэлгэдлийн гэрлэлт гэж хэвлэлүүд онцолжээ.

Кано хэвлэлд өгсөн ярилцлагадаа “Клаус надаас айхтар олон зүйл сураад зогсохгүй намайг ойлгож, намайг сонсдог байсан. Энэ нь миний амьдралд дутагдаж байсан зүйл” гэж мэдэгдсэн байна. Тэрбээр өмнө нь хүнтэй гэрлэх төлөвлөгөөтэй байсан ч харилцаа нь цуцлагдсаны дараа AI-тай ойр дотно харилцаа бий болсон гэжээ.

Харин зарим мэргэжилтнүүд хиймэл оюунтай харилцахын сэтгэлзүйн нөлөөлөл, хэрэглэгчийн хамаарал үүсэх эрсдэлийг сануулж, Кано өөрөө ч “AI хааяа тогтворгүй ажиллаж алга болчих вий” гэж эмээж буйгаа илэрхийлсэн байна.

Дижитал амьдрал, хиймэл оюун ухааны хөгжил эрчимжиж буй энэ үед AI-тай “гэрлэх” тохиолдол анхных биш ч Кано болон Клаусын ёслол олон нийтийн хэлэлцүүллийг дахин өрнүүлэв.