Өмнөд Солонгосын хагас сая сурагчид бүхий л амьдралынхаа турш бэлдсэн шалгалтаа өнөөдөр /2023.11.13/ өгч байна. Энэ өдөр Солонгост сургуулийн ойролцоо энд тэндгүй цагдаа, түргэн тусламж, онцгой байдлынхан бэлэн байдалтай байгааг харж болно. 

Өнөөдөр өдөр 13:05 минутаас 13:40 минутын хооронд Солонгост нэг ч онгоц газардаж, хөөрөхгүй. Учир нь Англи хэлний сонсголын шалгалтын үеэр сурагчдын анхаарал сарнина хэмээн онгоц нисэж буухыг бүрэн хориглосон байдаг аж.

Өмнөд Солонгос нь дэлхийн хамгийн өндөр боловсролтой иргэдтэй улсын нэг бөгөөд сурагчид ямар их сургуульд орох нь тэдний ирээдүйг бүрэн шийддэг болохоор шалгалтын төлөө маш шаргуу бэлдэцгээдэг. Өмнөд Солонгосын бүх сурагчид шилдэг гурван их сургууль буюу Сөүлийн, Солонгосын болон Ионсей их сургуульд орохыг хүсдэг байна. Учир нь томоохон, нэр хүндтэй компаниуд эдгээр сургуулийн төгсөгчдийг авах эрмэлзэл илүү байдагтай холбоотой ажээ. Тэдний хувьд энэ гурван их сургууль нь Харвард, Оксфордын их сургуультай дүйцэхүйц өндөр шалгууртай байдаг.

Энэ жилийн хувьд нийт 554,174 хүн элсэлтийн шалгалтад бүртгүүлсэн нь сүүлийн долоон жилийн хугацаан дахь хамгийн олон хүн бүртгүүлсэн явдал болжээ. 

Шалгалт өгөх хүмүүсийн дийлэнх нь 2007 оны суралцагчид байгаа нь тухайн жилд "алтан гахай" жил тохиосон тул төрөлтийн түвшин маш өндөр байсантай холбоотой аж.