Туркийн прокурор Истанбул хотын дарга Экрем Имамоглуг авлига, албан тушаалаа урвуулан ашигласан хэргээр буруутган, түүнд 2,000 гаруй жилийн хорих ял оноох санал гаргажээ.

Гадаад хэвлэлүүдийн мэдээлснээр прокурорын зүгээс Имамоглуг “олон тооны авлигын гэрээ байгуулсан”, “төрийн хөрөнгийг буруугаар ашигласан”, “хуурамч баримт бүрдүүлсэн” зэрэг 60 гаруй зүйл ангиар буруутгаж байгаа аж.

Reuters агентлагийн мэдээлснээр, хэргийн мөрдөн байцаалт нь сүүлийн хоёр жилийн турш үргэлжилж байгаа бөгөөд прокурор нийт 2,000 гаруй жил хорих ял төлөвлөж буйг мэдээлжээ. Харин Euronews-ийн эх сурвалжид “2,352 жил хүртэл” гэсэн тодорхой тоо дурдагдсан байна. 

Имамоглу нь Туркийн сөрөг хүчний гол төлөөлөгч, 2028 оны ерөнхийлөгчийн сонгуульд өрсөлдөх магадлалтай гол нэр дэвшигчдийн нэгт тооцогддог. Тиймээс энэхүү хэрэг нь улс төрийн зорилготой байж болзошгүй гэсэн байр суурийг түүний өмгөөлөгчид илэрхийлжээ. Одоогоор Истанбулын шүүх энэ хэргийг хянах шатандаа явж байгаа бөгөөд шүүх хурал ирэх долоо хоногт үргэлжлэх төлөвтэй байна.