Энэтхэгийн нийслэл Дели хотын түүхэн Улаан цайз (Red Fort)-ын ойролцоо байрлах метроны буудлын дэргэд өчигдөр орой автомашин дэлбэрсний улмаас дор хаяж найман хүн амиа алдаж, 20 гаруй хүн шархадсан талаар AP News мэдээллээ.

Дэлбэрэлтийн үеэр гэрлэн дохио хүлээж байсан автомашин гэнэт шатаж дэлбэрсэн бөгөөд ойролцоох бусад автомашин, авто рикша ч мөн галд өртжээ.

Одоогоор Энэтхэгийн цагдаа нар уг хэрэгт терроризмийн холбоо байгаа эсэхийг шалгаж, мөрдөн байцаалтыг эхлүүлсэн байна. Албаны эх сурвалжуудын мэдээлснээр дэлбэрэлт хүчтэй байсан тул ойр орчмын барилга, дэд бүтцэд ч гэмтэл учирчээ.

Энэтхэгийн Дотоод хэргийн яам онцгой байдлын багуудыг газар дээр нь ажиллуулж, шархадсан иргэдийг ойролцоох эмнэлгүүдэд яаралтай хүргэснийг мэдээлэв.

Цагдаагийн газрын анхны дүгнэлтээр уг автомашин шатахуун болон хийн сав тээвэрлэж байсан байж болзошгүй гэж үзэж байгаа бөгөөд дэлбэрэлтийн шалтгаан тодорхой болоогүй байна.