АНУ-ын Төлөөлөгчдийн танхимын гишүүн, тус танхимыг удирдаж байсан анхны эмэгтэй Нэнси Пелоси улс төрийн тавцангаас бүрэн зодог тайлахаа мэдэгдлээ. Тэрбээр 2026 онд болох Конгрессийн сонгуульд дахин өрсөлдөхгүй гэдгээ албан ёсоор зарласан байна.

Пелоси “Би ард түмнийхээ төлөө 37 жил зүтгэлээ. Одоо дараагийн үеийн удирдагчдад боломж олгох цаг ирсэн” хэмээн мэдэгдсэн талаар AP News мэдээлжээ.

Тэрбээр 1987 оноос хойш Калифорни мужийг төлөөлөн Конгрессод ажиллаж, 2007 онд Төлөөлөгчдийн танхимын анхны эмэгтэй спикер болсон түүхтэй. АНУ-ын ардчиллын бэлгэ тэмдэг хэмээн үнэлэгддэг Пелоси улс төрийн туршлага, манлайлах чадвараараа сүүлийн хэдэн арван жилд Америкийн улс төрийн гол нөлөө бүхий эрхмүүдийн нэг байсаар ирсэн юм.

Түүний шийдвэрийг улс төрийн хүрээнд “түүхэн эрин үеийн төгсгөл” хэмээн тодорхойлж байна.