ОХУ-ын Ерөнхийлөгч Владимир Путин дор хаяж 24 хамаатан саднаа төрийн байгууллага болон төрийн өмчит компанийн өндөр албан тушаалд томилсон талаар бие даасан “Proekt” мэдээллийн агентлаг болон барууны хэвлэлүүд мэдээлжээ.

Эх сурвалжуудын мэдээлснээр эдгээр хүмүүсийн дунд түүний ах дүү, үеэл, хүргэн, хамаарал бүхий хүмүүс багтсан бөгөөд тэд төрийн яам, агентлаг болон стратегийн ач холбогдол бүхий “Газпром”, “РусГидро” зэрэг компанийн удирдлагын албан тушаалд ажиллаж байна.

Тухайлбал, түүний үеэл Михаил Путин “Газпром”-ын дэд гүйцэтгэх захирлаар, хүргэн Сергей Цивилев Эрчим хүчний сайдаар, харин Сергейгийн эхнэр Анна Цивилева Батлан хамгаалахын дэд сайдаар томилогдсон байна. Мөн Виктор Хмарин “РусГидро” компанийн удирдах албан тушаал хашиж байгаа аж.

“The Moscow Times”-ийн мэдээлснээр, энэ нь Оросын удирдагчдын дунд сүүлийн 100 жилийн хугацаанд бүртгэгдсэн хамгийн олон хамаатнаа төр, төрийн өмчит байгууллагад зэрэг томилсон тохиолдол болж байна.

Харин Кремль уг мэдээлэлд ямар нэгэн хариу өгөөгүй байгаа бөгөөд шинжээчид үүнийг “улс төр дэх хамаатны нөлөө улам хүчээ авч буйг илтгэсэн үйл явдал” хэмээн дүгнэжээ.