ОХУ-д сүүлийн үед хамгийн их анхаарал татаж буй хэргүүдийн нэг Усольцевын гэр бүлийн сураггүй алга болсон хэрэг байсаар байна. 64 настай Сергей Усольцев, түүний эхнэр 48 настай Ирина, таван настай охин Арина нар Красноярскийн хязгаарын тайгад амьдардаг байсан бөгөөд хэд хоногийн өмнөөс холбоо тасарч, одоог хүртэл олдоогүй байна.

Цагдаагийн байгууллага болон сайн дурынхан өргөн хүрээний хайгуул явуулж байгаа ч тодорхой үр дүнд хүрээгүй байгаа аж. Хайгуулын ажиллагаа хэдэн долоо хоногийн турш үргэлжилж, онгоц, дрон, сайн дурынхны тусламжтайгаар ой тайг, усны эрэг дагуу өргөн хүрээнд эрэл хийсэн ч ямар ч бодит ул мөр илрээгүй байна. Энэ нь хэргийн эргэн тойронд янз бүрийн таамгийг бий болгожээ.

Хамгийн сүүлийн мэдээллээр “Аргументы и факты” сонин болон “Известия” зэрэг хэвлэлүүдэд, уг гэр бүл Монгол Улсаар дамжин гадаад руу гарсан байж болзошгүй гэсэн таамаг дэвшүүлсэн байна. Зарим эх сурвалж тэднийг өмнө нь Монголтой холбоотой бизнесийн харилцаа байсан хэмээн онцолжээ.

Гэсэн хэдий ч мөрдөн байцаах байгууллага энэ хувилбарыг батлах нотлох баримт одоогоор олдоогүй, мөрдөн шалгах ажиллагаа үргэлжилж байгааг онцолсон байна.