Трамп Катар, Египет, Туркийн лидерүүдтэй хамтран Газын зурвасын гал зогсоох хэлэлцээрт гарын үсэг зурж, Ойрхи Дорнодод урт хугацааны энх тайван бий болно гэдэгт итгэлтэй байгаагаа илэрхийллээ.

Израиль талаас 2000 орчим хоригдлыг суллаж, харин Палестины гэр бүлүүд Газын зурвас болон Баруун эрэг дэх ойр дотныхоо хүмүүстэй дахин уулзах боломж олдсон байна. Үүний зэрэгцээ 154 хоригдлыг Египет рүү шилжүүлсэн гэж мэдээлж байна.

Хамас бүлэглэл өөрсдийн барьцаанд амьд байсан Израилийн 20 хоригдлыг суллаж, нас барсан дөрвөн хүний цогцсыг хүлээлгэн өгчээ.

Өнгөрсөн оны 10-р сараас хойш үргэлжилж буй Израилийн цэргийн ажиллагааны улмаас Газын зурваст 67,869 хүн амь үрэгдэж, 170,105 хүн гэмтэж бэртжээ. Харин 2023 оны 10-р сарын 7-нд болсон Хамасын халдлагаар Израильд 1139 хүн амиа алдаж, 200 орчим хүн барьцаалагдсан юм.

Австралийн Батлан хамгаалахын сайд Ричард Марлес Sky News телевизийн ярилцлагад оролцох үеэрээ Газын зурваст энхийг сахиулах хүчин илгээх асуудлыг судлан үзэх боломжтой гэж хэллээ.

2023 оны аравдугаар сарын 7-нд ХАМАС-ын халдлагын хариуд Израилийн арми өргөн хэмжээний цэргийн ажиллагаа эхлүүлсний дараа Газын зурвас үнс балгасаар дүүрсэн саарал талбар болон хувирсан.

67,000 гаруй палестин хүн амь үрэгдсэн бөгөөд балгас дор хэдэн арван мянган цогцос булаатай хэвээр байгаа гэж үздэг. Орон сууц, сургууль, эмнэлэг зэрэг бараг 200,000 барилга эвдэрч, сүйдэж, тоо томшгүй олон хүмүүсийг нүүлгэн шилжүүлжээ. Аль-Шифа эмнэлэг гэх мэт чухал дэд бүтцүүд устаж, Газын эмнэлгийн системийг сүйрүүлсэн.

Олон Улсын Эрүүгийн Шүүхэд Израиль улс геноцидын хэргээр шалгагдаж байна.