Непалд өнгөрсөн амралтын өдрүүдэд үргэлжилсэн хүчтэй аадар борооны улмаас үер, хөрсний гулгалт болж, нийтдээ 47 хүн амь насаа алдсан тухай албаныхан мэдээллээ. Ихэнх хохирол зүүн бүсийн Иллам дүүрэгт гарсан бөгөөд хөрсний гулгалтад өртөж 35 хүн, үерийн урсгалд 9 хүн, цахилгаанд цохиулж 3 хүн амь үрэгджээ.

Орон нутгийн аврах алба, цагдаа, армийнхан газар дээр болон агаараар эрэн хайх, аврах ажиллагаа явуулж байгаа ч зам гүүр эвдрэн нурсан, гол усны түвшин нэмэгдсэнээс ажил ихээхэн хүндрэлтэй байгаа талаар мэдээлэв. Нийслэл Катманду хотод ч мөн үерийн урсгалын улмаас зам, гүүр, харилцаа холбоо тасалдаж, нийтийн тээврийн хөдөлгөөн хязгаарлагджээ.

Засгийн газар аюулын түвшний сэрэмжлүүлэг гаргаж, иргэдийг өндөр эрсдэлтэй бүс нутгаас нүүлгэн шилжүүлэх арга хэмжээ авч эхэлсэн байна. Онцгой байдлын газраас олон аймагт эвдрэл сүйтэл ихээр гарсан тул нөхцөл байдлыг хүнд гэж дүгнэжээ.

Мөн Непалын Засгийн газар 10 дугаар сарын 6, 7-ны өдрүүдийг улс даяар ёслолын амралт болгон зарлаж, гамшгийн нөхцөл байдлыг даван туулах ажлыг түргэвчлэхээр бүх шатны байгууллагууд хамтран ажиллаж байгаа юм.