Хятадын Жэжян мужийн Вэнжөү хотын дунд шатны шүүхээс Мьянмарт төвтэй гэмт хэргийн бүлэглэлийн 11 гишүүнд цаазын ял оноожээ. Тэднийг цахим залилан, хүн худалдаалах, хууль бус мөрийтэй тоглоом, аллага зэрэг олон төрлийн хүнд гэмт хэрэгт буруутгасан байна.

“Минг” овгийн гэмт бүлэглэл хэмээн нэрлэгдсэн энэ сүлжээ Коканг бүс нутагт олон жилийн турш үйл ажиллагаа явуулсан бөгөөд Хятад, Мьянмарын хил орчмын оршин суугчдад ихээхэн хохирол учруулжээ.

Шүүхийн шийдвэрээр мөн таван хүн "хоёр жилээр хойшлуулсан" цаазын ял авч, бусад 12 гишүүнд 5–24 жилийн хорих ял оноосон байна.

Энэхүү хэрэг нь сүүлийн жилүүдэд Хятадын эрх баригчдын кибер залилан, хил дамнасан гэмт хэрэгтэй хийх тэмцлийн хүрээнд гарч буй хамгийн том шүүхийн шийдвэрүүдийн нэг болж байна.