Энэтхэгийн эрх баригч BJP намын хэвлэлийн төлөөлөгч өөрийг нь үндэсний телевизээр өмдгүй гарсан гэж шоолж буй нийгмийн сүлжээн дэх постуудыг устгуулахаар шүүхэд нэхэмжлэл гаргажээ.

Гаурав Бхатиа мягмар гарагт Делигийн дээд шүүхэд түүнийг зохисгүй хувцасласан гэх видео бичлэгийг өөрийнх нь зөвшөөрөлгүйгээр тараасан гэж үзэн “нэр хүндэд халдаж гүтгэсэн” зүйл ангиар нэхэмжлэл гаргасан байна.

Бхатиа 9-р сарын 12-ны өдрийн телевизийн мэтгэлцээнд Энэтхэгийн үндэсний туник гэх хувцас өмссөн боловч өмдгүй байсан. Энэ дүрс бичлэг олон нийтийн сүлжээгээр тарснаар интернэт хэрэглэгчид болон сөрөг хүчний намын гишүүд Бхатиаг шоглох болсон.

Ноён Бхатиа нэхэмжлэлдээ "хүн ​​нэр хүндээ олон арван жилийн турш олж авдаг" гэж үзэн бүдүүлэг үг хэллэг бүхий онлайн контентуудыг устгуулахыг хүссэн.

Мягмар гарагт нэхэмжлэлийг хүлээн авсан шүүгч Амит Бансал Бхатиаг улс төрч хүн "ширэн нүүртэй" байх ёстой гэж мэдэгджээ.