Непал улсад өрнөж буй Gen Z үеийн залуусын эсэргүүцлийн хөдөлгөөн улс төрийн хямрал дагуулж, Ерөнхий сайд К. П. Шарма Оли огцроход хүргэсэн. Жагсаалын дараах улс төрийн шилжилтийн үеэр олон нийтийн дунд шинэ удирдагчдын нэрс тодорч эхэллээ.

Жагсагчдын гол нүүр царайд “Hami Nepal” байгууллагын тэргүүн Судан Гурунг тодорч, залуусын дуу хоолой болж байна. Түүнийг олон нийтийн жагсаал цуглааныг уриалан зохион байгуулсан гол идэвхтнүүдийн нэг хэмээн хэвлэлүүд онцолжээ.

Мөн жагсагчдын хэсэг бүлэг Дээд шүүхийн анхны эмэгтэй ерөнхий шүүгч асан Сушила Каркийг түр засгийн газрын удирдагчаар томилохыг шаардаж байна. Тэрбээр шударга ёсны төлөө тууштай байр суурьтай гэдгээрээ танигдсан юм.

Нөгөө талд нь, Катманду хотын дарга, реппер Балендра Шах (Balen Shah) залуусын дунд хамгийн их дэмжлэг хүлээж буй улстөрчдийн нэгээр нэрлэгдэж байна. Түүнийг улс төрийн шинэчлэл, авлигын эсрэг дуу хоолой гэж үзэх хандлага өргөн тархжээ.

Одоогоор хөдөлгөөнийг удирдах нэг төвлөрсөн манлайлагч тодроогүй байгаа ч иргэний нийгмийн төлөөлөл, залуу үеийн идэвхтнүүд хамтран манлайлаж буй нь онцлог болж байна.