Орос улс Украины нийслэл Киевт дайны эхнээс хойших хамгийн том хэмжээний агаараас цохилт хийж, Засгийн газрын байр анх удаа өртжээ.

Associated Press, Reuters-ийн мэдээлснээр, 2025 оны есдүгээр сарын 7-нд болсон довтолгоонд 800 гаруй дрон, хэд хэдэн пуужин ашигласан бөгөөд Украины агаарын хамгаалалт ихэнхийг нь устгасан ч хэсэг нь нэвтэрч, хотын төвийг онов.

Засгийн газрын байрны дээвэр болон дээд давхрууд ноцтой эвдэрч, гал гарсан байна. Хотын захиргаа мэдээлснээр дөрвөн хүн, түүний дотор гурван сартай нярай хүүхэд амь үрэгдэж, олон арван хүн шархаджээ.

Украины Ерөнхий сайд Юлия Свириденко “Алдсан амь насыг буцааж чадахгүй, гэхдээ бид эвдэрсэн барилгыг сэргээнэ” гэж мэдэгдсэн бол Ерөнхийлөгч Владимир Зеленский хамгаалалтаа бэхжүүлэх талаар олон улсын түншүүдтэй яриа хэлэлцээ хийж буйгаа онцолжээ.

Олон улсын зүгээс энэ үйл явдлыг хатуу буруушаасан бөгөөд Их Британийн Ерөнхий сайд Кийн Стармер, Европын Комиссын дарга Урсула фон дер Лейен нар үүнийг “аймшигтай халдлага” гэж тодорхойлсон байна.

Харин Оросын Батлан хамгаалах яам Киев дэх цэргийн болон логистикийн байгууламжийг онилсон гэж мэдэгдсэн ч, Засгийн газрын байрыг чиглэсэн цохилтыг хүлээн зөвшөөрөөгүй байна.