АНУ-ын Дотоодын аюулгүй байдлын яам (DHS) олон улсын оюутан, солилцооны хөтөлбөрийн оролцогчид болон гадаадын сэтгүүлчдэд олгодог визийн хугацааг тогтмол хязгаарлах шинэ журам танилцууллаа.

Шинэ журмаар оюутны (F) болон солилцооны (J) визийг сургалтын хугацаатай уялдуулан сунгадаг уян хатан системийг халж, дөрвөн жилийн тогтмол хугацаатай болгох санал дэвшүүлсэн байна. Харин гадаадын сэтгүүлчдэд олгодог (I) визийн хугацаа 240 хоног буюу найман сар болж багасах бол Хятадын сэтгүүлчдэд энэ хугацаа 90 хоног байхаар тусгажээ.

Хугацаа дууссаны дараа оюутан, сэтгүүлчид АНУ-ын харьяалал, цагаачлалын албанд сунгалтын хүсэлт гаргах боломжтой ч нарийн шалгалт, нэмэлт шаардлагуудтай тулгарах аж.

Албаны тайлбартаа АНУ-ын тал “визийн давтан ашиглалтыг багасгах, аюулгүй байдлыг хангах зорилготой” гэжээ. Гэсэн ч боловсролын байгууллагууд болон хэвлэлийн эрх чөлөөг хамгаалагчид энэхүү өөрчлөлт нь олон улсын оюутан, судлаачдын суралцах боломжийг хязгаарлах, мөн сэтгүүлчдийг хяналт, дарамтад оруулах эрсдэлтэй гэж шүүмжилж байна.

Шинэ журам хэрэгжихээс өмнө 30 хоногийн хугацаанд олон нийтийн саналыг авч, эцэслэн батлах юм байна.