БНАСАУ-ын удирдагч Ким Жон Ун Украины эсрэг дайнд оролцож байхдаа амь үрэгдсэн цэргүүдийн дурсгалыг хүндэтгэж, цэргийн хохирол амссаныг хүлээн зөвшөөрч "сэтгэл нь өвдөж байна" гэж мэдэгджээ.

Пүрэв гарагт Ким Пхеньянд болсон ёслолын үеэр баруун Курск мужид Оросын талд байлдаж байсан ангийн командлагч нартай уулзсан тухай Хойд Солонгосын төрийн мэдээллийн KCNA агентлаг мэдээлэв. Тэрбээр тэднийг “баатарлаг арми” хэмээн магтсан бөгөөд Ким цэргүүдийн дүрэмт хувцсанд сайшаалын тэмдэг зүүж буйг харуулсан дүрс төрийн хэвлэл мэдээллийн хэрэгслээр цацагдсан байна.

Тэрбээр "Агуу их ялалт, алдар хүндийн төлөө үнэт амь насаа өгсөн эрхэмсэг хүмүүстэй дурсгалын ханан дээрх гэрэл зургуудаар л уулзаж байгаа бодит байдалтай нүүр тулж, сэтгэл минь өвдөж, гашуудаж байна" хэмээн үг хэлжээ. Украин болон АНУ-ын тагнуулын мэдээлснээр Орост Хойд Солонгосын 12,000 орчим цэрэг байгаа бөгөөд тэдний эхний хэсэг 2024 оны намар илгээгджээ. Барууны албаныхны мэдээлснээр Хойд Солонгосын 4000 орчим цэрэг амь үрэгдэж, шархадсан байна.

Украины албаныхны 7-р сард гаргасан шинэ тагнуулын мэдээгээр Хойд Солонгос Орос дахь цэргийнхээ тоог гурав дахин нэмэгдүүлэхээр төлөвлөж байгаа бөгөөд ойрын саруудад Москвад туслахын тулд 25-30 мянган цэрэг нэмж илгээнэ. Харин Москвагийн зүгээс Пхеньянд сансрын болон хиймэл дагуулын дэвшилтэт технологи, тус улсын цөмийн зэвсгийн хөтөлбөрийг эрчимжүүлж чадах технологи гэх мэт тусламжаар хариу барьж магадгүй юм.