Хүүхдүүдийн дунд алдартай “Labubu” хүүхэлдэйний хуурамч хувилбарууд дэлхийн хэд хэдэн оронд худалдаалагдаж, хүүхдийн амь нас, эрүүл мэндэд ноцтой аюул учруулж болзошгүй талаар анхааруулга гаргалаа.

АНУ-ын Consumer Product Safety Commission (CPSC)-ээс гаргасан мэдэгдэлд “Lafufu” нэртэй хуурамч Labubu хүүхэлдэй нь жижиг хэсгүүд амархан салж, хүүхдийн амьсгал боогдуулах, аманд тээглэх аюултайг онцолжээ. Тэдгээрийг хууль бусаар оруулж ирсэн бөгөөд аль хэдийнээ хэдэн арван мянган ширхэгийг хураан авсан байна.

Их Британийн Trading Standards байгууллага мөн адил анхааруулга гаргаж, тус улсад худалдаалагдсан хуурамч хүүхэлдэйнүүдийг 2,000 орчим ширхгийг хураажээ. Тэдгээр нь шаардлагатай CE, UKCA тэмдэглэгээгүй, аюулгүй байдлын шалгуурыг хангаагүй байжээ.

Ирландын CCPC (Competition and Consumer Protection Commission) ч мөн худалдаанд гарсан хуурамч Labubu хүүхэлдэйг эргэн татаж, хэрэглэгчдэд “ашиглахаа шууд зогсоох”-ыг уриалсан байна.

Хуурамч бүтээгдэхүүнүүдийг танихдаа:

• Жинхэнэ Labubu 9 шүдтэй байдаг бол хуурамчид нь энэ тоо өөр байдаг,

• Жинхэнэ бүтээгдэхүүн дээр холограм наалт, QR код, UV тэмдэглэгээ заавал бий,

• Хэт тод өнгө, маш хямд үнэ нь мөн хуурамчийн шинж тэмдэг хэмээн мэргэжилтнүүд зөвлөжээ.

“Эдгээр тоглоомыг эцэг эхчүүд хэзээ ч гэртээ авчрах ёсгүй. Хүүхдийн амь насанд заналхийлж болзошгүй” хэмээн АНУ-ын CPSC мэдэгдэлдээ онцолсон байна.

Жинхэнэ Labubu хүүхэлдэй АНУ-д дунджаар 30 ам.доллараас дээш үнэтэй худалдаалагддаг бол ховор загварууд нь хэдэн мянган ам.доллар хүрэх тохиолдол байдаг аж. Харин хуурамч хувилбарууд хямд үнээр цахим худалдаа болон зарим дэлгүүрээр тархаж байгаа нь эрсдэлийг нэмэгдүүлж байна.