Он гарснаас хойш үнэ нь 30 орчим хувиар өссөн дотоодын шатахууны зах зээлийг тогтворжуулахын тулд Оросын эрх баригчид наймдугаар сарын 31 хүртэл бензин экспортлохыг бүрэн хориглосон шийдвэрээ сэргээв.

ОХУ-ын Засгийн газар шатахууны хомсдолыг арилгах, өндөр үнэтэй тэмцэхийн тулд сүүлийн хоёр жилийн хугацаанд шатахууны экспортод түр хориг тавьсаар байсан. Санкт-Петербургийн түүхий эдийн бирж дээр шатахууны бөөний үнэ өнгөрсөн долоо хоногийн эхнээс өссөөр байгаа бөгөөд алдартай Аи-95 төрлийн шатахууны үнэ нэг тонн нь 76,293 рубль буюу 962.69 ам.долларт (3,456,122.09 төгрөг) хүрч, бүх цаг үеийн дээд хэмжээнд хүрсэн байна. Орос улс жилд 40 сая гаруй тонн бензин үйлдвэрлэдэг.

Хязгаарлалтад Москва тэргүүтэй Евразийн эдийн засгийн холбоо, хуучин ЗХУ-ын бүрэлдэхүүнд багтаж байсан таван улс, Монгол зэрэг ОХУ-тай шатахуун нийлүүлэх тухай Засгийн газар хоорондын гэрээтэй орнуудыг оруулахгүй гэж эх сурвалжууд мэдээлжээ.